Dea Ricku të sjell në mend, sapo e takon, se do të kishte qenë më e përshtatshme si vajzë pasarelash dhe jo si police. Bukuria e saj bie në sy krahas uniformës, ku dallohet qartë edhe shkopi i gomës. E gjatë, elegante, me buzëqeshje të ëmbël dhe zë karakteristik, pak të ulët e me ngjyra, ajo të rrëfen qetësisht për veten. I pëlqen shumë profesioni që ka zgjedhur dhe pret shumë nga vetja. Edhe pse vetëm 21 vjeçe, ka një vit që ka veshur uniformën e policisë.

Kualifikimi

Dea Ricku ka përfunduar një kurs profesional 6-mujor, ku është trajnuar si police. Në të njëjtën kohë studion juridik në Universitetin e Tiranës. Aktualisht është në vitin e parë të studimeve të masterit shkencor në drejtimin penal, që i përshtatet natyrës së punës dhe e ndihmon të njohë më mirë rregullat dhe ligjet.

Ajo thotë se e ka dashur gjithmonë profesionin e policisë, sepse i pëlqen të vendosë drejtësi. Siç tregon, nuk ka qenë kurrë e përkëdhelur, as ajo dhe as motrat e saj.
“Nëse prindërit e fëmijëve të tjerë shkonin në shkollë dhe kërkonin që t’u mbanin hatër, prindërit e mi vinin vetëm në takimin e parë dhe u thoshin mësuesve: ‘Ju e mësuat që Dea ka prind; mund të bëni çfarë të doni me të.” “Vendosmëria e saj duket në gjithçka. Në moshën 17-vjeçare mësoi të ngiste motorë fillimisht virtualisht, duke parë dokumentarë në YouTube, dhe kur doli në rrugë për herë të parë, e bëri e vetme, duke u thënë shokëve se dinte t’i ngiste. Nuk u rrëzua atëherë dhe as më pas.

Puna

Dea e nisi punën si police e rendit në komisariatin e Kamzës. Ajo thotë se punën nuk e sheh të vështirë: “E shoh thjesht si punë dhe nuk mendoj kurrë pjesën e keqe apo të rrezikshme të saj.”Prej janarit 2016 punon me patrullën “Shqiponjat” dhe është shumë e kënaqur me këtë detyrë, sepse uniformat dhe kushtet janë ndër më të mirat.
Tregon se marrëdhëniet me kolegët janë të mira dhe se ka marrë pjesë në ngjarje të rënda, por nuk i përjeton keq dhe madje pret sfida të tjera. Bukuria e saj në fillim e ka penguar, pasi nuk e merrnin seriozisht. Ajo kujton një rast kur shoqëroi një grua me probleme mendore nga Kamza drejt spitalit. Gruaja ishte agresive dhe tentoi të godiste mjekun, por Dea e qetësoi me sjelljen e saj. Shoferi i ambulancës i kishte thënë më pas se më parë mendonte se ishte gjynah që ishte bërë police, por pas atij rasti e kuptoi arsyen pse. Ajo shprehet se nuk ndikohet nga vështrimet apo provokimet. “Kam një qëndrim timin dhe nuk lejoj askënd ta kalojë atë.”

Të rendësh pas ëndrrave

Dea nuk u kishte treguar prindërve kur aplikoi për t’u futur në polici. Edhe kur dilte për provime, largohej herët pa dhënë sqarime. Vetëm kur doli rezultati, ku ajo jo vetëm fitoi por u rendit e para, ua tregoi. Prindërit nuk u gëzuan fillimisht, duke i thënë se ishte shumë e re për të punuar dhe duhej t’i përkushtohej shkollës. Kur e pyesin çfarë ndien kur njerëzit flasin keq për policët, përgjigjet menjëherë:
“Me mua askush nuk flet keq për policët, sepse nuk i lejoj.” Në 103-vjetorin e Policisë, fotoja e saj me një qen pastor u shpërnda në rrjet, dhe portali “Opozita.com” e publikoi me titullin “Buçet e Sajmir Tahirit”, çka u prit shumë keq nga opinioni publik. Dea, e cila nuk përdor më rrjete sociale, e mori vesh nga të tjerët dhe thotë se reagoi duke qeshur:
“Do mërzitesha vetëm nëse do ishte e vërtetë. Mund t’i hidhja në gjyq, por nuk kam kohë për të humbur.”

E ardhmja në uniformë

Jeta e saj është e shpejtë, mes turneve të punës dhe masterit. Ajo thotë se ka ende drojë kur i drejtohet qytetarëve, ndërsa kolegët duken më të sigurt. Sidoqoftë, është e vendosur të përmirësojë komunikimin dhe të mos lejojë askënd të ngatërrojë bukurinë me aftësitë. Ajo mendon se futja e grave në polici është diçka shumë e rëndësishme, edhe pse numri i tyre është ende i vogël. Përfaqësimi i tyre ka ardhur duke u rritur, nga 6% në 10%, dhe sot arrin 13.6%. Sipas saj, kjo frymë e re tregon se femrat nuk do të mbeten vetëm në pozicione vartëse: së fundi, një femër u emërua shefe komisariati në Librazhd dhe pritet që katër të tjera të marrin role drejtuese.