Një diktator mund të të hedhë dorën në qafë,
të qeshë krah teje në kamera.
Ti, a ndjen erën e gjakut në rrobat e zeza?
A ia lexon hartat e njollave që mbesin në tru përgjithmonë?

Një diktator do të të mësojë si të mendosh,
do të të japë një tokë të vogël ku të mbjellësh shkurre pa lule,
sepse një diktator nuk e duron dot të bukurën
që nuk ka dalë prej duarve të tij.

Një diktator do të të urdhërojë të heshtësh,
do të të sakatosë me fuqinë e tij.
Do të ulet këmbëkryq
në tavolinë, i paftuar,
do të hajë gjithçka,
dhe do të të mësojë t’i thuash:
“Faleminderit për praninë e tij.”

Një diktator do të ta mbulojë diellin,
sepse çdo diktator verbohet nga drita.
Ti do të vizatosh në trup një diell
që kurrë nuk do të të ngrohë.

Një diktator do të vijë të të qajë në varreza,
një ditë pasi të ka vrarë.
Ai do të të zhdukë qënien që ishe,
aq brutalisht,
sa zemra do të dridhet edhe në varr.